ماحسيت بحنان وعشت بجفاف عاطفي وضرب ع اتفه الاسباب

ضغوط الحياه كثيرة ومشاكلها أكثر وقد يضر بنا من حولنا ويضمرون لنا السوء من القول ولعمل وماعلينا سوى التحمل ولكن كما قال الشاعر :
وظلم ذوي القربى أشد مضاضةً *** على المرء من وقع الحسام المهند
عندما تتكالب علينا الهموم ويكون من نلجأ إليه بعد الله ليمسح دموعنا هو سبب بكاءنا عندها سيغلفنا الضعف الإنكسار كما تحدثنا الأخت ( م ) بالظلم الذي تعيشه قائلةً :

(( السلام عليكم ورحمة الله وبركاته , انا فتاة عمري ٢١ سنه متزوجه من سنتين وثلاث شهور تقريباً وحامل في الشهور الاولى.

مشكلتي بدات من صغري ماحسيت بحنان ولا حب من اهلي عشت بجفاف عاطفي وضرب من امي ع اتفه الاسباب , كانت تضربني وانا لم اتجاوز سبع سنين ضرب مبرح وتطردني من البيت في الظهر وكانت تحبسني في غرفه لوحدي وتمنعني من مشاهدة التلفاز مع اخواني وكانت تقول لاخواني لاتكلمونها ولا تلعبو معها.

عذبتني كبرت وكبر كرها لي والله اني اشوف الكره بعيونها , انضرب بالعصى لين يعلم على جسمي ولا اقدر انام من الالم وكلها بأسباب اكثر من تااااافهه , وكانت تسحبني بشعري وتضرب راسي بالجدار الخارجي للبيت (الخشن) وكانت تذلني لدرجة تضربني بشبشب ع وجهي والله ماانسى هالضربه , هذا غير ضربها لي بصطل الزباله – وانتوا بكرامه – ولو تلاحضون احسها بضربها لي فيه انتقام وحقد وودها في نفس الوقت تذلني وتكسرني.

كانت تخليني اشتغل واغسل المواعين وانا بأول او ثاني ابتدائي وكانت تدقق على كل شيء وتدور مشكله عشان تضربني وعمرها ماحسستني انها ام بالعكس كنت اكرها وانا صغيره ولا احب المسها وهي بالمقابل تحب تهمشني وتلغي شخصيتي وانا بطبيعتي شخصيتي قويه وجرياه لكن حطمتني وصار اللي تبي.

الان اعاني من الخجل والوسواس والاكتأب وصرت مأثق في احد وكانت تفضل اخواني علي وخاصه اختي اللي بعدي إلى أن صرت في المرحله الثانويه وانا على هالحال والحمد لله بعد الدعاء كل يوم تقريباً اني اتزوج وافتك من هالظلم اللي انا فيه تقدملي قريب لي من بعيد ووافقت على طووول < لاني كنت اعاني من ضغط نفسي بسببها.

الحمد لله الان احنا عايشين ومبسوطين تقريباً لكن ماخلصت صارت تتدخل في حياتي وتتقرب لزوجي بشكل ملفت يمكن عشان تقهرني الله اعلم انا ماشكيت الا من كلامها تقول انتي ماتحبين اني اتعامل مع زوجك ! , وانا والله ماعمري فكرت في هالسالفه
لكن من بعد كلمتها نبهتني وزوجي اعجبه الوضع وصار اذا حصل بيني وبينه مشكله يهدي امي ولا يعطيها كلمتين يعميها عن اخطاءه , وانا بطبعي ماحب اشكي.

ولاني داريه محد راح يقف بصفي مهما كان لان كلهم ماهمهم الا مصالحهم الخاصه , اذا حصل موقف معاه انا اتفاهم معاه بالغالب لكن زوجي صار كل مشكله لو تافهه راح لامي يشكي لانه شاف تأييد منها والله لو تشوفون كيف واقفه معه تقولون هذا ولدها وانا ماتعرفني من الاساس.

طيب فرضاً انا غلطانه صححي الموقف وصالحينا وخلاص ليش تزيد المشكله وتأيده لدرجه مره قالتله انت تدلعها لا تدلعها اضربها , واذا شافته معطيني فلوس تضايقت ! , اشياء والله اذا تذكرتها حسيت بقهر , وانا الحين وين اروح اذا اهلي واقفين ضدي بكل شيء والله ثم والله ودي اهج من البيت وارتاح من الهم.

وابوي تفكيره قديم اذا شكيت له او بررت موقف قعد يتلفض علي ويقول انقلعي لبيت زوجك الحرمه زي الخدامه مايحق لها شيء تحمد ربها وتسكت تطبخ وتغسل لزوجها وهي ساكته , هذا كلام ينااااس ؟؟

ابوي ماعنده حكمه ولا يعرف يربي للاسف كلامه وصخ واخواني مثله اتفشل اذا جاء زوجي وسمع كلام اخواني الصغار يتكلمون مثله عندنا أجداد مانعرفهم , جدتي من ابوي اخر مره شفتها يمكن في المتوسط واخواني الصغار ماعمرها شافتهم اختي عمرها الحين عشر سنوات عمرها ماشافتها ولا حتى جدي واخوي الثاني عمره ثمان سنوات برضو والثالث عمره سنه وشوي , يعني قطااااعه.

هذا فيض من غيض , ولا اعتراض لحكم الله لكن من باب الفضفضه احس اني مكبوته كل الناس ضدي والسبب اهلي هم اللي شوهو سمعتي , امي دايم تتكلم عني عند خالاتي عمرها مامدحتني عمرها ماشفتها واقفه معي بفرح ولا بحزن انا احتاج حنان فقده حنان وحب اجيها اكثر من مره ابكي ابي منها اقل شيء تمسح ع راسي وتواسيني ومع إني عارفه راح تصدني لكن وش اسوي مالي احد ودايم ارجع مكسوره , تصدني ونضراتها كلها استحقار وكانت قبل زواجي تدعي علي وتقول ((جعلك ترجعين مطلق يااارب))

انا الحين حامل ومن حملت وانا وزوجي بمشاكل الحمل يأثر ع نفسيت الحامل قلت خلني ابعد عند اهلي منها ارتاح ولا اصطدم مع زوجي ومارتحت للاسف انا مااحس بأستقرار اخاف من زوجي لاني في بداية زواجي اكتشفت انه يخوني بالمكالمات وكشفته يناضر افلام وصور اباحيه ويطلع للسوق بوقت الدوام يغازل وانا ماعمري قصرت عليه بشي من هالناحيه.

هالشيء سببلي جرح للان وانا اعاني منه وصرت مااثق فيه والمشاكل تلاحقني وين ماكنت , حسبي الله على من كان السبب.

اللهم من ارادني بسؤ فجعل تدبيره في تدميره , انا الحين جالسه بغرفه وسكره ع نفسي وكل شوي احس بالقهر وابكي وابكي واخاف هالشيء يؤثر ع الجنين واكون انا السبب لكن والله مابيدي شيء .

هل هناك خطوات اتبعها او طريقه معينها ممكن تخلي حياتي أفضل وأقل إرهاق ومشاكل ؟

خلاااص فاض الكيل , قلولي وش اعمل بالضبط ياناس ؟ ))

مصنفة تحت: قصص الحب